లో-వోల్టేజీ సమస్యతో విలవిలలాడుతున్న వెంకట్రావుపేట్ కాలనీవాసులు

పయనించే సూర్యుడు న్యూస్ మెట్‌పల్లి జూన్ 1 మెట్‌పల్లి పట్టణ పరిధిలోని వెంకట్రావుపేట్ కాలనీ (11వ వార్డు) ప్రజలు తీవ్రమైన లో-వోల్టేజీ విద్యుత్ సమస్యతో నానా అవస్థలు పడుతున్నారు. ఈ విషయమై కాలనీకి చెందిన పలువురు నివాసితులు, గ్రామస్థులు కలిసి శనివారం మెట్‌పల్లి అసిస్టెంట్ డివిజనల్ ఇంజనీర్ (ఏ.డి. ఈ) కి ఒక లిఖితపూర్వక వినతిపత్రాన్ని సమర్పించారు. నిలిచిపోతున్న బోర్ బావులు వెంకట్రావుపేట్ కాలనీలోని ప్రాథమిక పాఠశాల నుండి పోచమ్మ గుడి, చిలకల చిన్నమ్మ దేవాలయం వరకు ఉన్న విద్యుత్ స్తంభాల నుండి వస్తున్న కరెంటు తీవ్రమైన లో-వోల్టేజీ తో ఉంటోందని కాలనీవాసులు ఆవేదన వ్యక్తం చేశారు. దీనివల్ల ఇళ్లలోని ఫ్యాన్లు, ఫ్రిడ్జ్‌లు, టీవీలు వంటి ఎలక్ట్రానిక్ వస్తువులు పనిచేయకపోగా, అవి కాలిపోయే పరిస్థితి ఏర్పడిందని పేర్కొన్నారు. ఈ లో-వోల్టేజీ ప్రభావం వల్ల అటు తాగునీటి మోటార్లు, ఇటు వ్యవసాయ/వ్యక్తిగత బోర్ బావులు కూడా సరిగ్గా నడవక నీటి ఎద్దడి తలెత్తుతోందని, తీవ్రమైన ఇబ్బందులు ఎదుర్కొంటున్నామని వారు వాపోయారు. 11వ వార్డు పరిధిలోని వెంకట్రావుపేట్ కాలనీ నివాసితుల కష్టాలను దృష్టిలో ఉంచుకుని, ఈ లో-వోల్టేజీ సమస్యకు శాశ్వత పరిష్కారంగా వెంటనే ఒక నూతన విద్యుత్ ట్రాన్స్‌ఫార్మర్‌ను ఏర్పాటు చేయాలని కాలనీ ప్రజలు అధికారులను వేడుకుంటున్నారు. వినతి పత్రాన్ని ఉన్నతాధికారులైన మెట్‌పల్లి ఆర్.డి.ఓ. కి, అలాగే జగిత్యాల జిల్లా కలెక్టర్ కి కూడా సమాచారం నిమిత్తం పంపినట్లు కాలనీవాసులు తెలిపారు. వినతిపత్రం సమర్పించిన వారిలో 11 వార్డ్ కౌన్సిలర్ రెడ్ బస్ మహేష్, భూరం రాజేష్, బి. బాబురావు, బి. బాబయ్య, బి. శంకర్, బి. నర్సయ్య, అమీన్, రమేష్ తదితర కాలనీ నివాసితులు ఉన్నారు.