పయనించే సూర్యుడు, జూలై 7 (సంగారెడ్డి జిల్లా జహీరాబాద్ మండల ప్రతినిధి: స్వాతి, నర్సిములు): జహీరాబాద్ పట్టణ కేంద్రంలో భారత మాజీ ఉప ప్రధానమంత్రి మరియు భారతరత్న బాబు జగ్జీవన్ రామ్ వర్ధంతి కార్యక్రమాన్ని సోమవారం అత్యంత ఘనంగా నిర్వహించారు. ఈ సందర్భంగా పట్టణంలోని ఆయన విగ్రహానికి రాష్ట్ర కాంగ్రెస్ పార్టీ నాయకుడు డాక్టర్ సిద్ధం ఉజ్వల్ రెడ్డి మరియు తెలంగాణ రాష్ట్ర పారిశ్రామిక మౌలిక వసతుల సంస్థ మాజీ చైర్మన్ మహ్మద్ తన్వీర్ పూలమాలలు వేసి భక్తిశ్రద్ధలతో ఘనంగా నివాళులు అర్పించారు. అనంతరం వారు మాట్లాడుతూ సామాజిక న్యాయం, సమానత్వం మరియు పేదల అభ్యున్నతికి బాబు జగ్జీవన్ రామ్ చేసిన సేవలు చిరస్మరణీయమని కొనియాడారు. భారత వలసపాలన వ్యతిరేక స్వాతంత్ర్య సమరంలో ఆయన చురుకుగా పాల్గొని మహాత్మా గాంధీ ఆశయాలను ప్రజల్లోకి తీసుకెళ్లడంలో కీలక పాత్ర పోషించారని గుర్తుచేశారు. కేంద్ర మంత్రిగా దేశ సమగ్ర అభివృద్ధికి విశేషంగా కృషి చేసి ప్రజానాయకుడిగా అఖండ గుర్తింపు పొందారని పేర్కొన్నారు. ప్రతి మనిషికి సమాన హక్కులు ఉండాలి అనే బాబు జగ్జీవన్ రామ్ ఆదర్శ సిద్ధాంతం నేటి సమాజానికి ఎంతో ఆదర్శప్రాయమని ఆయన ఆశయాలను ప్రతి ఒక్కరూ ఆచరణలో పెట్టాలని పిలుపునిచ్చారు. ఈ నివాళులర్పించే కార్యక్రమంలో జహీరాబాద్ మండల కాంగ్రెస్ పార్టీ అధ్యక్షుడు పి నర్సింహారెడ్డి, మున్సిపల్ చైర్మన్ మహ్మద్ యునూస్, వైస్ చైర్మన్ శిరీష సురేందర్ రెడ్డి, మున్సిపల్ కౌన్సిలర్లు శ్రీధర్ రెడ్డి, జాఫర్, జమిలాలోద్దిన్, రంగా అరుణ్, అతిక్, జహీంగిర్, అక్రం, నిజాం మరియు సీనియర్ కాంగ్రెస్ నాయకులు గుండా రెడ్డి, బి గోపాల్, అశ్విన్ పాటిల్, యువజన కాంగ్రెస్ నాయకులు మరియు స్థానిక ప్రజలు పెద్ద సంఖ్యలో పాల్గొన్నారు.
