పయనించే సూర్యుడు, జూలై 3 (సంగారెడ్డి జిల్లా జహీరాబాద్ మండల ప్రతినిధి: స్వాతి, నర్సిములు): గత భారత రాష్ట్ర సమితి ప్రభుత్వం చేసిన అభివృద్ధి మరియు ప్రస్తుత కాంగ్రెస్ ప్రభుత్వం చేసిన పాలనపై బహిరంగ చర్చకు ముఖ్యమంత్రి రేవంత్ రెడ్డి విసిరిన సవాల్ను భారత రాష్ట్ర సమితి కార్యనిర్వాహక అధ్యక్షుడు కల్వకుంట్ల తారక రామారావు స్వీకరించి చర్చకు సిద్ధమని ప్రకటించినా కాంగ్రెస్ మంత్రులు భయంతో తోకముడిచారని షెడ్యూల్డ్ కులాల సహకార సంస్థ మాజీ అధ్యక్షుడు వై నరోత్తం గురువారం ఒక ప్రకటనలో ఎద్దేవా చేశారు. మంత్రి జూపల్లి కృష్ణారావు తెలంగాణ భవన్కు వచ్చి చర్చిస్తామని స్వయంగా ప్రకటించి కూడా కాంగ్రెస్ ప్రభుత్వానికి వాస్తవాలను ఎదుర్కొనే దమ్ము మరియు ధైర్యం లేక నిర్ణయించిన సమయానికి రాకుండా తప్పించుకున్నారని మండిపడ్డారు. తెలంగాణ భవన్ వద్ద మంత్రి జూపల్లి కృష్ణారావు కోసం ఖాళీ కుర్చీ వేసి ఎంత ఎదురుచూసినా ఆయన రాకపోగా కాంగ్రెస్ మంత్రులు గన్ పార్క్ వద్దకు వస్తున్నాం దమ్ముంటే రండి అని ముగ్గురు మంత్రులు మరో సవాల్ విసిరారని తెలిపారు. ఆ సవాల్ ను స్వీకరించి భారత రాష్ట్ర సమితి సీనియర్ నాయకుడు మరియు మాజీ మంత్రి తన్నీరు హరీశ్ రావు గన్ పార్క్ వైపు బయలుదేరితే కాంగ్రెస్ మంత్రులు తోకముడిచారని ఆరోపించారు. భారత రాష్ట్ర సమితి నాయకులు చర్చకు వస్తే కాంగ్రెస్ ప్రభుత్వ అవినీతి మరియు స్కాముల వాస్తవాలు బయటపడి ప్రజల ముందు పరువు పోతుందనే భయంతో పోలీసులను అడ్డుపెట్టుకొని గన్ పార్క్ వరకు వెళ్లకుండా అడ్డుకోవడం కాంగ్రెస్ ప్రభుత్వ చేతకానితనానికి నిదర్శనమని విమర్శించారు. మంత్రులు అద్లూరి లక్ష్మణ్ కుమార్, పొన్నం ప్రభాకర్ మరియు మహ్మద్ అజహరుద్దీన్ లు గన్పార్క్ వద్దకు రావాలని ప్రకటించగా ఆ చర్చకు వెళ్లేందుకు బయలుదేరిన మాజీ మంత్రి హరీశ్ రావును పోలీసులు అడ్డుకుని అరెస్ట్ చేయడం ప్రజాస్వామ్యాన్ని పూర్తిగా అపహాస్యం చేయడమేనని అన్నారు. తెలంగాణ భవన్కు వస్తామని చెప్పిన మంత్రి జూపల్లి కృష్ణారావు ఎందుకు రాలేదో మరియు గన్పార్క్ వద్ద చర్చకు వెళ్తున్న హరీశ్ రావును పోలీసులు ఎందుకు అడ్డుకుని అరెస్ట్ చేశారో తెలంగాణ ప్రజల తరఫున కాంగ్రెస్ ప్రభుత్వాన్ని ప్రశ్నిస్తున్నామని ఈ ప్రశ్నలకు ప్రభుత్వం సమాధానం చెప్పాల్సిన బాధ్యత ఉందని స్పష్టం చేశారు. కాంగ్రెస్ ప్రభుత్వానికి ప్రజలకు జవాబు చెప్పే దమ్ము మరియు ధైర్యం ఉంటే అరెస్టులతో కాకుండా వాస్తవాలతో బహిరంగ చర్చకు రావాలని వై నరోత్తం సవాల్ విసిరారు. ఈ కార్యక్రమంలో మాజీ సర్పంచ్ సిద్దన్న పాటిల్, ఈశ్వరప్ప, ఎస్ గోపాల్, మాణిక్యప్ప తదితరులు పాల్గొన్నారు.
