పయనించే సూర్యుడు నవంబర్ 3, కాకినాడ రూరల్ (బి వి బి) గండ్లు పూడ్చివేతతో ఏలేరు వరద నీటికి సాఫీగా మార్గం నీటి సంఘం అధ్యక్షులు నాగిశెట్టి అమ్మిరాజు ఆధ్వర్యంలో పనులు ముమ్మరం కాకినాడ రూరల్: ఏలేరు వరద నీరు ఎలాంటి ఆటంకాలు లేకుండా సముద్రంలోకి చేరేలా కాకినాడ రూరల్ మండలంలో కాలువల అభివృద్ధి, మరమ్మతు పనులు యుద్ధ ప్రాతిపదికన కొనసాగుతున్నాయి. కాలువలకు ఏర్పడిన గండ్లను పూడ్చడంతో పాటు, నీటి ప్రవాహానికి అడ్డంకిగా మారిన గుర్రపు డెక్కను తొలగించే పనులను నీటి సంఘం అధ్యక్షులు నాగిశెట్టి అమ్మిరాజు పర్యవేక్షణలో ముమ్మరంగా చేపడుతున్నారు.
కాకినాడ రూరల్ మండల పరిధిలోని పండూరు, తిమ్మాపురం, తమ్మవరం గ్రామాల మీదుగా సముద్రంలోకి వెళ్లే ప్రధాన కాలువలు, అనుసంధాన కాలువల్లో పేరుకుపోయిన గుర్రపు డెక్క, ఇతర వ్యర్థాలను తొలగిస్తున్నారు. పలు ప్రాంతాల్లో కాలువలకు ఏర్పడిన గండ్లను గుర్తించి వాటిని పూడ్చివేస్తున్నారు. దీంతో వరద నీరు నిలిచిపోకుండా, సులభంగా సముద్రంలోకి వెళ్లేందుకు మార్గం సుగమం అవుతోంది. వర్షాకాలంలో ఏలేరు వరద నీటి ఉధృతి పెరిగినప్పుడు కాలువల్లో పూడిక, గుర్రపు డెక్క కారణంగా నీటి ప్రవాహానికి అంతరాయం ఏర్పడే అవకాశం ఉంది. దీనివల్ల లోతట్టు ప్రాంతాల్లో నీరు నిలిచి రైతులు, గ్రామీణ ప్రజలు ఇబ్బందులు ఎదుర్కొనే పరిస్థితులు తలెత్తుతాయి. ఈ సమస్యలను ముందుగానే గుర్తించిన నీటి సంఘం కాలువల నిర్వహణపై ప్రత్యేక దృష్టి సారించింది.
కాలువల ప్రవాహ సామర్థ్యాన్ని పెంచి, వరద ముప్పును తగ్గించడమే లక్ష్యంగా పనులు చేపడుతున్నట్లు నీటి సంఘం అధ్యక్షులు నాగిశెట్టి అమ్మిరాజు తెలిపారు. సంబంధిత ప్రాంతాల్లో పనులను వేగవంతం చేసి, నీటి ప్రవాహానికి ఎలాంటి ఆటంకాలు లేకుండా చర్యలు తీసుకుంటున్నట్లు పేర్కొన్నారు. కాలువల మరమ్మతులు, గుర్రపు డెక్క తొలగింపు పనులతో ఏలేరు వరద నీటి మళ్లింపునకు మేలు చేకూరుతుందని, రైతులకు మరియు లోతట్టు ప్రాంత ప్రజలకు ఊరట కలుగుతుందని స్థానికులు ఆశాభావం వ్యక్తం చేస్తున్నారు.
