పయనించే సూర్యుడు / జూలై 4 / దిడ్డి రాము / జమ్మికుంట రూరల్ ; ఇల్లంతకుంట మండలానికి నూతన తహసీల్దార్గా బాధ్యతలు స్వీకరించిన మనోజ్ కుమార్ను శ్రీ సీతారామచంద్రస్వామి దేవస్థానం చైర్మన్ ఇంగిలే రామారావు మర్యాదపూర్వకంగా కలిసి శాలువాతో ఘనంగా సన్మానించారు. ఈ సందర్భంగా దేవస్థానం తరఫున మెమెంటోతో పాటు ముత్యాల తలంబ్రాలను అందజేసి శుభాకాంక్షలు తెలిపారు. ఈ సందర్భంగా ఇంగిలే రామారావు మాట్లాడుతూ, విద్యార్థుల భవిష్యత్తును దృష్టిలో ఉంచుకుని కుల, ఆదాయ, నివాస ధ్రువీకరణ పత్రాలను ఎలాంటి జాప్యం లేకుండా త్వరితగతిన జారీ చేయాలని కోరారు. అలాగే మండల ప్రజలు రెవెన్యూ కార్యాలయానికి వచ్చే వివిధ సమస్యలను సత్వరమే పరిష్కరించేలా ప్రత్యేక దృష్టి సారించాలని విజ్ఞప్తి చేశారు. నూతన తహసీల్దార్ మనోజ్ కుమార్ ప్రజలకు పారదర్శకమైన, జవాబుదారీతనంతో కూడిన సేవలు అందిస్తూ ప్రభుత్వ సంక్షేమ కార్యక్రమాలను సమర్థవంతంగా అమలు చేస్తారని ఆశాభావం వ్యక్తం చేశారు. అధికారులు ప్రజలకు అందుబాటులో ఉండి వారి సమస్యలను సానుకూల దృక్పథంతో పరిష్కరించాలని ఈ సందర్భంగా సూచించారు. ఈ కార్యక్రమంలో శ్రీ సీతారామచంద్రస్వామి దేవస్థానం ధర్మకర్తలు గొడిశాల పరమేష్, గోలి కిరణ్ తదితరులు పాల్గొని నూతన తహసీల్దార్కు శుభాకాంక్షలు తెలియజేశారు. కార్యక్రమం ఆత్మీయ వాతావరణంలో నిర్వహించబడింది.
